剪利筋後遺症

Dec 16 10am 做手術後, 11:30am回婆婆家, 之後食咗一餐奶, 食得好慢, 可能個口仲痛啦..... 食完就poopoo咗1次, d便便有d黑色添, 之後都一路有poopoo, 全個下午至夜晚total poo咗4次
Dec 17 poo咗7次, 便便有d "lim"嘢.
Dec 18 朝早已經poo咗2次, 所以都要帶佢去睇醫生, 打去醫院耳鼻喉科, 姑娘話一定唔關個手術事, 我本來係擔心佢手術前食果d藥水搞到佢敏感, 但個姑娘就好firm咁話唔會喎.... 於是就番去睇番個兒科Dr Lau, 我帶埋d便便俾佢睇, 佢話唔算好差, 佢聽下佢個肚話d腸又唔係郁得好快, 可能d腸有少少發炎, 但佢咁細都唔會開藥俾佢食, 建議種菌, 因為只係痾唔知會唔會有咩病毒或者細菌..... 或者可以幫佢轉飲豆奶試下睇下會唔會好d..... 今日全日poo咗6次
Dec 19 今日去咗買豆奶, 我諗小寶食得出唔同, 因為佢食時皺眉頭, 我估都唔多好食囉.... 今日poo咗10次
Dec 20 poo咗9次, 成個pat都紅晒, 真陰公!! 轉咗豆奶好似仲差咗, d便便水咗, 所以我同媽咪商量過都係轉番奶粉..... 但係咁樣痾法真係擔心死人, 所以都要再去睇多次醫生, 但我又唔想再睇Dr Lau, 佢好似頗求其囉, 於是上網搵下兒科醫生兼睇下評語, 搵咗一個莫子慈醫生, 網上既comment都好好
Dec 21 10am打去康健醫務中心預約睇莫醫生, 約到最快11:40am
去咗登記咗仲要等多9個先到我地睇..... 康健係大概10年前已經有, 我都有去睇過, 不過而家擴充得好勁, 去睇既人亦都好多, 好多人戴住口罩, 呢樣嘢係我最唔鐘意, 因為真係好恐佈, 好多菌, 仲有個細路响門口嘔, 嚇死我...... 好在佢開响商場入面, 媽咪可以抱小寶周圍行下, 唔駛焗响裡面等, 我就响門口等嗌名..... 9個都唔係等咗好耐, 大概12:15pm已經可以見醫生....
我同莫醫生講晒成個story, 佢問我點解要同佢去剪利筋 (佢個語氣係話俾我知我唔應該同佢做囉, 我解釋話睇過專科醫生都話佢好大機會黐利筋所以就襯佢細個做咗佢, 佢聽完冇俾反應, 亦冇話我做得啱定唔啱..... 但睇得出佢係否定我既做法囉.....) 莫醫生好細心咁同佢檢查過, 佢開咗d腸胃藥粉, 止肚痛肚風藥水俾小寶, 佢話d藥好輕, 唔會一食就止痾, 只係可以幫佢舒緩下, 佢仲建議種菌, 因為要種菌先可以確定佢裡面有冇細菌然後先可以對症下藥, 而家最驚係洛沃克病毒或者係黃金葡萄球菌, 所以我都決定要種菌! 醫生仲健議將d奶粉開稀d, 我地照做, 今日poo咗6次
Dec 22 poo咗6次, 但唔同前幾日不定時咁痾, 都係飲完奶先痾, 莫醫生話係正常, 因為一食咗奶入去條腸會移動就會刺激到佢
Dec 23 poo咗3次, 已經好番好多
Dec 24 暫時只係尋晚半夜3點幾飲完奶痾咗1次

希望小寶真係已經好番, 種菌報告出黎一切正常就好喇!!
今日係平安夜, 今年係第一年同bb一齊過christmas, 雖然佢仲咁細個, 未能夠感受到節日氣氛, 但我仍然好期待!
Aiden, Merry first Christmas!!