Release Tongue Tie Operation

尋晚幾經辛苦, 3am先瞓得著........
搞到今朝幾經辛苦先起到身, 都已經8am.........
拿拿聲起身梳洗, around 8:45am出門口....... 落到街...... 竟然落雨...... 冇帶遮....... 同婆婆一齊出咁多次街都未落過雨, 今日得我地兩仔乸先至黎落雨????

基本上帶咗遮都冇用, 因為根本冇手拎...... 唯有抱實aiden快步行去的士站, 仲得一架的士...... 點知說時遲那時快, 唔知响邊度衝咗一個男子出黎而佢, 係有擔遮既, 佢望一望我兩母子, 就跳咗上的士........ 我有諗過呢個男子上到的士會唔會為佢自己呢種咁冇風度, 咁冇同情心既動作而感到可恥?? 我一定要敎導我既小朋友, 即使只係一個小孩, 都首先要學習禮讓, 尤其是要禮讓有需要既人仕, 巴士地鐵上面都黐晒貼紙, 但時下年青人, 中年人, 無論係咩世代既人都絕少有呢種意識, 我覺得好難過........

Luckily, 都好快就有的士!
去到醫院, 先去1/F"日間手術中心"登記, 登記完個姑娘就點咗個嬸嬸同我落G/F pay deposit 同埋攞藥...... 俾完deposit個嬸嬸叫我坐低等佢攞藥, 其間佢個醫院專用電話響, 電話中人(我估係頭先個姑娘)同佢講話要同bb磅重先, 係喎, 尋日Dr Tsang都講過話要磅咗重先去攞藥, 因為要跟據aiden既重量去開瞓覺藥既! 唉.... 成班人都唔知做乜...... 咁又點番我上1/F磅重, aiden重4.69kg, 個嬸嬸仲响度等我同bb著番件衫, 我咪同佢講, 你唔駛等我啦, 你拎個重量落去藥房攞藥先啦, 我心諗: 我抱住個bb唔落去啦, 我自己亦都識路番番去"日間手術中心"囉!!!! 點知我真係覺得自己做得好啱, 因為我幫bb著好晒衫之後, 個姑娘又話"仲"要量血壓.... 唉.... 做乜事做少少嘢要分幾part黎做?? 不過個姑娘對aiden都好溫柔, 值得讚賞!

搞完晒磅重量血壓, 我就帶番aiden番去"日間手術中心", 跟住有個姑娘帶咗我地入一間房仔, 問我一d基本問題, 例如bb最近呢個星期有冇發燒呀, 有冇離開過香港, 有冇對藥物或食物敏感等等呢d例牌問題...... 跟住就係等d藥送上黎......... 等等等等等........ 到d瞓覺藥黎到時都唔知幾多點, 我聽到d姑娘响出面話"要快d餵喇, 差唔多喇, 要快手d....." 跟住有兩個姑娘入黎, 其中一個姑娘提出幫我餵, 當然佢地餵會比我餵快好多, 老實講我都冇乜信心.....
:( 我估d藥應該幾難食, 因為aiden喊得好嘈, 又每一啖都漏番d出黎, 要食2支針筒咁多......... 食咗起碼有5分鐘, 佢個樣都幾痛苦, 喊到收唔到聲..... 食完姑娘就叫我盡快靄佢瞓..... 盡快? 我盡力啦!! 當時我個心係咁諗: 如果婆婆响度就好喇, 佢應該會好快手囉....... 不過我都不負所託, 响10點前都可以靄到佢瞓, 10:03am Dr Tsang到咗, 到大概10:10am就叫我抱bb過去手術室, 放低咗aiden落手術床之後, 姑娘就用毛巾將aiden捲住, 只係露出個頭, 有成5個姑娘响度, 跟住就叫我出番去頭先間房仔度等...... 幾分鐘之後, 就聽到小寶淒慘既叫喊聲..... 我企咗响房仔既門口度再聽清楚, 究竟係咪我個仔既喊聲呢?? 成間日間手術中心都係得我個仔一個baby, 呢d喊聲梗係佢嫁啦, 姑娘見我呆呆咁企咗响度, 就叫我入番房仔話唔好聽住d喊聲, 我會好心痛, 跟住佢就關咗我度門! 冇錯, 真係會好心痛, 就咁我就企咗响房仔入面眼濕濕, 其實隔住度門都聽到佢淒涼既喊聲囉....... 過咗幾分鐘 (我都唔知係幾多分鐘, 但彷彿係好耐咁)我又開番度門, 想睇下幾時先做完手術出黎, 我真係好心急囉..... 由手術室門口既玻璃窗度見到有個姑娘响度來回踱步, 喊聲停咗, 相信姑娘係抱緊小寶安撫緊佢..... 冇幾耐, 醫生+成班姑娘抱番aiden出黎俾我, 當我抱番佢既時候, 見到佢成個口都係血...... oh my god 我既眼淚又忍唔住流咗出黎..... 點解我小寶咁細個就要受呢個苦?? 醫生話幫佢剪入d費事剪得唔夠入又要黎做多次 (well, 我聽唔明佢講乜, 乜唔係剪夠就得喇咩? 因咩事要剪入d呢? 都唔知會唔會有影響??) 所以有血流要電咗兩下去幫佢止血! 小寶一邊响度喊, 合唔埋個口, 成口血, 我覺得好痛囉...... 跟住醫生叫我抱下佢安撫下佢先, 佢轉頭再黎睇下佢止唔止到血....... 咁我又响度抱住佢靄佢..... 過咗一陣, 個醫生就入黎睇佢, 話冇再流血, 可以俾少少水佢睇下佢飲唔飲, 咁我問佢唔係餵奶咩, 佢話都得, 如果佢係醒既話就可以俾奶佢食...... 跟住佢就話去巡房先, 一陣再黎睇下bb有冇唔舒服..... 咁我就俾咗少少水小寶飲, 佢飲咗少少水跟住我再靄下佢瞓, 後尾瞓著咗我就等醫生黎睇咗佢冇乜特別嘢就帶咗小寶去俾錢攞止痛藥, 就番屋企了! 呢個咁既Dr Tsang話如果冇流血, 個口冇臭味, 冇乜其他異樣就唔駛再番去覆診喎! 如果唔肯食奶就即是代表佢傷口痛, 可以食d止痛藥咁話!

番到屋企飲完奶, 佢都表現得好似唔係幾like, 唔係幾happy, 又keep住勁喊啦..... 可能痛呀!!! 但婆婆話唔駛食止痛藥住, 再睇下先, 我諗係因為婆婆唔想佢一日裡面食咁多藥..... 都啱既, 所以我都聽婆婆話, 睇定d先......

so far 都okay, 剛做完利尖有點紅點都散咗, 利底仲係有一撻白色, 冇再流血, 口亦好香......

唔知係咪錯覺, aiden做完手術條利好似肥咗, 之前一直都覺得係利尖尖咁........ 咦, 終於都有樣嘢係似媽咪喇, hahaha

紀念品(只因為係佢個名所以先留來紀念, 絕非係紀念呢個手術!)